Die belangrikheid van kruip
Alet Victor
Ons weet dat kruip een van die belangrike mylpale vir ‘n baba se ontwikkeling is. Hoe help ek ‘n baba in my klas wat nie wil kruip nie?
Ons het by Alet Victor, ‘n Arbeidsterapeut in Centurion gaan aanklop vir praktiese hulp.
Oefeninge terwyl Baba op haar maag lê:
- Plaas Baba in kruipposisie met gewig op reguit arms en lig dan haar heupe op sodat sy op hande viervoet staan. Wieg haar saggies vorentoe en agtertoe sodat sy die gevoel van beweging kry.
- Laat Baba oor ‘n roller, sagte bal of jou bobene lê met haar bene aan die een kant by die knieë gebuig en met haar armpies aan die ander kant, m.a.w. in kruipposisie, maar gestut oor iets.
- Laat Baba hurk (staan) teen ‘n bal, jou bene of ‘n lae oppervlak en vir ‘n rukkie so speel. Gee bietjie propriosepsie* deur heupe af te druk.
- Gebruik ‘n lapdoek (spoegdoek) of kombersie. Rol dit langwerpig op en plaas onderdeur Baba se arms (dwars oor haar bors). Lig haar bo-lyf op sodat sy in die kruip posisie is en moedig haar aan om vorentoe te kruip of te beweeg. Die doek kan ook meer na agter geskuif word sodat die heupe opgelig word – pasop egter dat sy nie vooroor val nie!
Oefeninge tewyl Baba op haar rug lê:
- Oefen fietsie trap met haar beentjies deur die een te buig en die ander reguit te maak en dan weer om te ruil. Knie moet na teenoorgestelde skouer beweeg (midlynkruising).
- Gee propriosepsie* deur twee gewrigte na mekaar te druk (knie en enkel of enkel en heup).
- Plaas haar voete plat op die grond en moedig haar aan om te brug deur haar lae rug en boudjies van die grond af op te lig.
* Propriosepsie beteken in wese die wisselwerking tussen die brein en spierstelsel waar inligting van die een party die ander help om ‘n besluit te neem en weer die inligting terug te stuur met ‘n opdrag.
Alet Victor: 0828525464; alet.victor@gmail.com