Kreatiewe Wiskunde maak jou slimmer
Nicolene du Preez
Het u geweet dat wiskunde deel vorm van probleemoplossing? Het u ook geweet dat probleemoplossing ʼn direkte verband hou met kreatiwiteit? Kreatiwiteit is die proses om ʼn probleem te identifiseer en dan op te los. Kreatiewe denke is nie net baie belangrik vir die jong kind nie, maar ook belangrik vir volwassenes. Daar is ʼn rede waarom die meeste skoolgereedheid- en intelligensie toetse die konsepte van ontbrekende dele, begrip, patroonvoltooiing, soek-die-ooreenkomste, getalprobleme en blokpatrone bevat. Hierdie toetsing van konsepte help om te bepaal hoe die leerder se kognitiewe ontwikkeling plaasgevind het.
Dink aan ʼn huis wat gebou word, vir die doel van hierdie artikel gaan ek verwys na ʼn wiskunde-huis. Die bogenoemde konsepte maak deel uit van die fondament van die wiskunde-huis. Hoe meer tyd aan die wiskunde-huis spandeer word hoe vinniger word die huis gebou. Onthou net dat as ʼn huis nie stewig gebou word nie, maar vinnig duik daar later probleme op. Soos wat die konsepte vasgelê word, kan onderwysers en kundiges bepaal hoe baie daarvan verstaan is. Dit kan deur verskillende metodes bepaal word soos bv. deur intelligensie- of skoolgereedheidstoetse soos vroeër verwys. Dit gee ons ʼn indikasie van hoe stewig die fondament is en hoe ver die bouproses al gevorder het.
Ouers kan hul kinders se brein wiskundig instel deur kreatief te dink en beter wiskundige fondamente bou in hulle alledaagse handel en wandel. Hier volg ʼn paar voorbeelde van hoe dit gedoen kan word:
- Speel woordsom speletjies of raaisels met onderliggende wiskundige taal en konsepte terwyl u skool toe ry of self wanneer u staan en kos maak. Hier is so ʼn voorbeeld: Mamma het twee sakkies wortels wat sy by die groentewinkel gekoop het. Beide het dieselfde hoeveelheid wortels in. As mamma hulle saam op die kas pak is daar 10 wortels. Hoeveel dink jy is elke sakkie?
- Betrek jou kind by iets wat julle beplan vir jul gesin of tuiste, bv. Mamma en Pappa wil graag ʼn nuwe bankie bou vir die tuin. Die bankie moet so geplaas wees dat mens van daar af kan uitkyk oor die tuin, sag sit en dit moet ook die elemente soos reën kan trotseer. Waar dink jy is ʼn goeie plekkie daarvoor, en wat dink jy is nog belangrike vereistes en voorwaardes vir die bankie? Hoekom sê jy so? (onthou om jou kind te lei en positief te komplimenteer, in die begin mag dit dalk voel dat u kind se antwoorde deurmekaar is en geen sin maak nie, maar dit is die proses wat u kind deurgaan om sy of haar eie denke te formuleer, wat belangrik is.
- Sê iets soos: Kom ons speel ʼn speletjie: Mamma gaan eerste vir jou sê wat haar gunsteling getal is en hoekom ek so sê, dan gaan ek sê wat ek weet van die getal en jy kan kyk of jy ook iets van my getal weet. Daarna ruil ons beurte. My gunsteling getal is die getal drie. Ek hou van die getal drie, want dit laat my aan die storie van Die Drie Varkies dink. Ek weet dat drie plus drie ses is, ek weet dat ons drie honde het, en ek weet ook dat oor drie slapies kom ouma kuier. Wat weet jy van die getal drie?
- Klassifikasie speletjies is baie lekker en kinders geniet dit om speel-speel te leer. Kry saam met jou kind speelgoeddiere uit vir die aktiwiteit. Jy kan dan saam speel en die diere met verskillende eienskappe klassifiseer, bv. sit al die diere wat swem op een kussing of sit al die diere met 4 bene in die bad of selfs, sorteer jou diere in groepies waarvan jy die meeste hou en diere wat jy minder van hou. Eksperimenteer dalk ook met voorwerpe wat sink en drywe, sorteer hulle in twee groepies.
- Soek die vorms wat in die huis en tuin voorkom. Speel speletjies soos Mamma sê: sit jou neus teen ʼn sirkel in die tuin, soos bv. die ronde tafelblad. Gee jou kind die geleentheid om dieselfde met jou te doen. Kinders floreer op deelname en entoesiasme, so as jy beter resultate wil hê begin deur saam te speel.
Nicolene du Preez