Wanneer jou kind hospitaal toe gaan
Wietske Boon
Hospitalisering kan vir kinders baie traumaties wees. Behalwe dat hy/sy siek of in pyn is, is die hospitaal ‘n onbekende plek wat die kind bang en alleen kan laat voel. Kinders voel baie keer dat hulle min beheer oor hul lywe en die situasie het en ervaar min of geen privaatheid.
Kinders se vrese en bekommernisse kan die volgende insluit:
- “Ek wil nie hier wees nie! Ek wil huis toe gaan.”
- “Ek is bang.”
- “Gaan ek gesond word? Wat as ek nie gesond word nie?”
- “Ek is verantwoordelik vir die ontwrigting van ons gesinslewe.”
- “Gaan ma of pa die mediese kostes kan betaal?”
- “Ek verlang na my maats en die skool.”
Wanneer ‘n kind voorberei word op hospitalisasie kan dit trauma verminder. Hier is ‘n paar wenke:
- Verduidelik stap vir stap wat gaan gebeur – as jy onseker is vra die hospitaalpersoneel om jou te help.
- Lees ‘n kinderboek wat die mediese prosedure op die kind se vlak verduidelik.
- Moedig mediese spel met mediese speelgoed aan. Mediese spel hou baie voordele vir die kind en die sibbe in:
- Dit gee die kind ‘n gevoel van beheer wanneer hy/sy speels die dokter of verpleegster is;
- Dit maak dit vir die kind maklik om mediese prosedures te verstaan;
- Dit is ‘n medium vir die kind om sy/haar vrese, emosies en vrae te kommunikeer;
- Dit maak dit vir ouers en mediese personeel makliker om prosedures te verduidelik;
- Dit is pret!
- Laat jou kind kies watter speelgoed hy/sy wil saamneem hospitaal toe. Neem liefs ‘n geliefde speelding saam as om nuwes te koop.
- Wees altyd eerlik.
- Moet nooit ‘n kind dreig met die dokter of ‘n inspuiting wanneer hy/sy ongehoorsaam is nie.
Dit is normaal dat kinders se gedrag verander gedurende en na hospitalisasie. Veranderinge kan skeidingsangs, nagmerries en slaap- of eetprobleme insluit. Indien die kind se gedrag hom/haar negatief beïnvloed, kry professionele hulp om jou kind te help om die trauma te hanteer.
Wietske Boon Spelterapeut, www.childtherapist.co.za; wietske@childtherapist.co.za